ФК «Віцебск» у пераходных матчах заваяваў права ў наступным годзе выступіць у вышэйшай лізе чэмпіянату краіны.

Мінскі «РЦАР-БДУ», магчыма, быў не такім прыемным сапернікам, як «Белшына» з Бабруйска. У апошнім туры «студэнты» класна разабраліся са «Славіяй» з Мазыра 3:1 і атрымалі шанец на выратаванне ад вылету з элітнага дывізіёна ў выглядзе стыкавых матчаў з нашай камандай. Характэрна, што сёлета калектывы сустракаліся ў рамках кубка, і тады «Віцебск» выйграў дома з лікам 1:0. Запомнім гэтыя лічбы.

Жэрабя вызначыла, што першая сустрэча пройдзе ў сталіцы, а другая ў абласным цэнтры. Мінскі матч атрымаўся складаным па многіх паказчыках. Перамерзлае поле і матч пры мінусавой тэмпературы адкрыта сапсавалі футбол. «Віцебск» пасля ранняга выдалення ў гаспадароў больш валодаў мячом, крыху актыўней біў па варотах і больш падаваў поန, але гэта ўсё ў забітыя мячы не вылілася. «РЦАР–БДУ» нічыя асабліва не парадавала б да пачатку сустрэчы, але пасля чырвонай карткі была прымальным вынікам.

У суботу супрацьстаянне перамясцілася ў горад на Дзвіне. Яшчэ большы мінус за акном вымусіў кіраўніцтва нашай каманды прымаць цяжкае рашэнне аб пераносе сустрэчы са звычайнага ўсім месца ў паветраапорны манеж. Умяшчальнасць яго трыбун усяго 300 гледачоў, а таму многія прыхільнікі футбола загадзя былі папярэджаны, што не змогуць трапіць на матч. Без падтрымкі ўсё ж наша каманда не засталася – хай і не ў самым вялікім складзе, але заўзятары актыўна гналі віцябчан наперад.

Ужо ў канцы пятай хвіліны адбылася першая праверка на трываласць галасавых звязак фанатаў. Абаронца гасцей неакуратна згуляў у сваёй штрафной супраць Яна Скібскага, і суддзя паказаў на 11-метровую адзнаку. Руслан Цевераў адразу забраў мяч і паказаў усім, што менавіта ён будзе выконваць пенальці. Удар віцебскага форварда быў бездакорны як па сіле, так і па дакладнасці.

Пасля забітага мяча гаспадары правялі яшчэ некалькі запамінальных атак, але забіць не атрымалася. Самыя яркія моманты ўпусцілі ўжо згаданыя Ян Скібскі і Руслан Цевераў. Разплата за марнатраўства ледзь не адбылася на 61-й хвіліне, але казахстанскі легіянер гасцей Абінур Нарымбет не здолеў трапна патрапіць па мячы ў пары метраў ад пустой брамы. За сем абаротаў секунднай стрэлкі да канца асноўнага часу ўжо Руслан Цевераў дараваў апанента ў найбольш спрыяльнай сітуацыі.

Апошнія хвіліны час няшчадна цягнуўся для адных і ляцеў для другіх. Свісток рэферы зафіксаваў мінімальную перамогу «Віцебска» 1:0. Летні вынік кубка быў паўтораны, але цяпер перамога мае куды больш значны эфект. Каманда абласнога цэнтра вяртаецца ў наймацнейшы дывізіён, заваяваўшы гэту пуцёўку ў выдатнай барацьбе з добрай камандай. Аляксандру Паўлаву, для якога гэта быў першы сезон у якасці галоўнага трэнера, удалося пасля няўдалага старту сабраць футбалістаў у адзіную ўдарную сілу.

Вяртанне ў вышэйшае святло беларускага футбола – гэта важны крок для сістэмы клуба. Каманда акрамя асноўнага складу сфармуе дублюючы, які цяпер будзе выступаць у другой лізе. У чэмпіянаце нам будуць супрацьстаяць лідары айчыннага футбола. Хто будзе супрацьстаяць ім у складзе нашай каманды – пытанне пакуль адкрытае. Напэўна, пасля добрага сезона ў многіх лідараў «паўночнікаў» будуць прапановы ад іншых калектываў, і наўрад ці ўсіх удасца захаваць. Трэба задумацца і над узмацненнем. Работы ў трэнерскага штаба і кіраўніцтва клуба ўжо сёння непачаты край. Аднак галоўнае, што задача на сезон выканана – «Віцебск» каманда вышэйшай лігі.

"Віцьбічы"