Анжаліка Нікіціна азнаёмілася з ходам рэалізацыі інавацыйнага праекта на «Аршааграмаш»
У рамках рабочага візіту ў Аршанскі раён намеснік старшыні Віцебскага аблвыканкама Анжаліка Нікіціна сустрэлася з працоўным калектывам ТАА «Аршааграмаш», азнаёмілася з ходам рэалізацыі інавацыйнага праекта на прадпрыемстве.
Характэрна, што сёння яно праходзіць новы этап у сваім развіцці – пасля вылучэння з ААТ «Аршааграпраммаш» таварыства ўваходзіць у склад холдынгу «Бабруйскаграмаш».
У ходзе дыялогу Анжаліка Нікіціна расказала пра дасягненні Віцебшчыны, у прыватнасці, Аршанскага рэгіёну.
Яна акцэнтавала ўвагу прысутных у зале на тым, што, з'яўляючыся дэпутатам абласнога Савета дэпутатаў дваццаць дзевятага склікання па Аршыцкім выбарчай акрузе № 38, не пакідае без увагі ніводнае пытанне ад насельніцтва рэгіёну.
– За 9 месяцаў бягучага года з 17 даведзеных урадам паказчыкаў сацыяльна-эканамічнага развіцця мы выконваем 15 і знаходзімся на лідзіруючых пазіцыях у краіне, – адзначыла намеснік старшыні. – Выканалі заданне па валавым рэгіянальным прадукце. Калі казаць пра Аршанскі раён, то тэмп росту прамысловай вытворчасці ў супастаўных цэнах дасягнуў 125,9 %. Па выніках мінулага года сярод гарадоў з колькасцю насельніцтва 80 тысяч і больш Аршанскі раён заняў 2 месца сярод 11 гарадоў і рэгіёнаў Віцебшчыны. Што сведчыць пра тое, што Аршаншчына развіваецца больш паскоранымі тэмпамі ў частцы прамысловага комплексу. Па тэмпах росту рэальнага заробку раён на 3 месцы. Ідзе напаўненне бюджэту – развіваецца сацыяльная сфера. Таксама фінансы накіроўваюцца на капітальныя рамонты жылля, будаўніцтва новага жылля з дзяржаўнай падтрымкай, абнаўляюцца дзіцячыя сады, школы, паліклінікі і інш. У тым ліку ў новым мікрараёне Оршы цяпер будуецца дзіцячы сад, на які і на 2024, і на наступныя гады цалкам выдзелены грашовыя сродкі. У 2025 годзе яго будаўніцтва будзе завершана. Што тычыцца новых інвестпраектаў (даручэнне кіраўніка дзяржавы «Адзін раён – адзін праект»), ва ўсіх рэгіёнах Віцебскай вобласці яны рэалізуюцца. Мы бачым, як дынамічна ідзе развіццё прадпрыемстваў у Аршанскім раёне.
На ТАА «Аршааграмаш» завяршаецца рэалізацыя інавацыйнага праекта «Стварэнне вытворчых магутнасцей па вырабе інавацыйнага бруса рэжучага і рэдуктараў для сельскагаспадарчай тэхнікі».