«Моцны Прэзідэнт, уплывовы парламент…» Прававая формула вызначана ў Беларусі

Прэзідэнт Беларусі Аляксандр Лукашэнка 28 чэрвеня падпісаў указ №196, якім зацверджана Канцэпцыя прававой палітыкі. Пра гэта БЕЛТА паведамілі ў прэс-службе беларускага лідара.

Канцэпцыя ўяўляе сабой дакумент, структураваны ў пяці главах, які вызначае стратэгію развіцця ўсёй прававой сістэмы краіны, якая ў сучасных умовах павінна не проста рэгуляваць грамадскія адносіны, але і папярэджваць магчымыя выклікі і пагрозы.

У межах канцэпцыі вызначаюцца паняцце прававой палітыкі Беларусі, яе мэты, прынцыпы, а таксама суб'екты: "Прававая палітыка - навукова абгрунтаваная дзейнасць дзяржавы пры ўдзеле грамадзян, грамадскіх інстытутаў па фарміраванні і развіцці ўсіх элементаў прававой сістэмы".

У дакуменце замацоўваюцца нацыянальныя гісторыка-культурныя асновы прававой сістэмы, прасочваецца эвалюцыйны шлях яе станаўлення: "На працягу ўсёй сваёй гісторыі краіне неаднаразова даводзілася адстойваць незалежнасць, забяспечваць бяспеку па перыметры межаў, аказваць дапамогу як цэлым дзяржавам, так і асобным групам насельніцтва. Дадзеныя працэсы адбіліся на менталітэце беларусаў, характар якіх заўсёды адрознівалі талерантнасць, стваральнасць, непрыняцце агрэсіі і ціску звонку. Важна захаваць і прымножыць гэтыя лепшыя якасці беларускага народа".

"Сёння Рэспубліка Беларусь - гэта дзяржава, пабудаваная на трывалым фундаменце агульначалавечых каштоўнасцей, якая імкнецца да мірнага суіснавання, канструктыўнага дыялогу і ўзаемавыгаднага супрацоўніцтва з іншымі дзяржавамі і рэгіёнамі, што знаходзіць адлюстраванне ў нацыянальным праве", - гаворыцца ў канцэпцыі.

Замацоўваюцца ідэалагічныя імператывы, якія выступаюць фундаментам прававой палітыкі. Дзяржаўны суверэніт і тэрытарыяльная цэласнасць з'яўляюцца ключавымі. На іх аснове рэалізуюцца астатнія - нацыянальная бяспека, народаўладдзе, сацыяльная справядлівасць і іншыя. Будзе абаронены канстытуцыйны лад - будуць абаронены інтарэсы грамадзян.

Таксама ў канцэпцыі прадугледжваюцца прыярытэтныя напрамкі развіцця галін заканадаўства. У сферах заканадаўства аб абароне і нацыянальнай бяспецы трэба будзе ўзмацніць абарону інфармацыйнага суверэнітэту краіны, распрацоўваць наднацыянальныя стандарты і правілы ў галіне інфармацыйнай бяспекі з акцэнтам на прасоўванне нацыянальных прававых інтарэсаў. У сферах грамадзянскага, эканамічнага (гаспадарчага) заканадаўства трэба будзе рэалізоўваць прынцып сацыяльнай адказнасці бізнесу перад дзяржавай, грамадствам і грамадзянамі. У межах заканадаўства, якое рэгулюе сацыяльную сферу, неабходна зрушыць акцэнты прававога рэгулявання ад апекі дзяржавы да ўсталявання партнёрскіх адносін паміж дзяржавай, грамадствам і грамадзянамі. Варта выбудоўваць узаемавыгаднае супрацоўніцтва, павышаць адказнасць кожнага грамадзяніна за сваё жыццё, здароўе і дабрабыт.

У Канцэпцыі прававой палітыкі захоўваецца трэнд на ўніфікацыю і кадыфікацыю. Прадугледжана кадыфікацыя заканадаўства ў сферы аховы навакольнага асяроддзя, інвестыцыйнага заканадаўства, а таксама сістэматызацыя заканадаўства ў сферы інтэлектуальнай уласнасці і інш.

У адпаведнасці з канцэпцыяй прававая праца будзе будавацца па формуле "моцны Прэзідэнт, уплывовы парламент, ініцыятыўны ўрад пры звязваючай ролі Усебеларускага народнага сходу".

Прымяненне канцэпцыі дазволіць актуалізаваць і накіроўваць усе прававыя працэсы - ад развіцця заканадаўства да навукі і адукацыі.

Крыніца: belta.by