Лукашэнка павіншаваў з 50-годзьдзем пачатку будаўніцтва БАМ удзельнікаў гэтага праекту

Прэзідэнт Беларусі Аляксандр Лукашэнка павіншаваў будаўнікоў, чыгуначнікаў і работнікаў Байкала-Амурскай магістралі з памятнай падзеяй – 50-годдзем пачатку будаўніцтва БАМ. Аб гэтым БЕЛТА паведамілі ў прэс-службе кіраўніка дзяржавы.
 
"БАМ – яркая старонка ў лёсе некалькіх пакаленняў савецкіх людзей і адзін з самых маштабных праектаў у гісторыі чалавецтва. Сотні тысяч сапраўдных энтузіястаў, нягледзячы на цяжкасці і суровыя прыродныя ўмовы, праклалі чыгуначны шлях праз горныя хрыбты, непраходную тайгу і зону вечнай мерзлаты. Як паказаў час, ён стаў дарогай у будучыню, якая сёння злучае многія расійскія рэгіёны і з'яўляецца найважнейшым фактарам развіцця Усходняй Сібіры і Далёкага Усходу", – гаворыцца ў віншаванні.
 
Аляксандр Лукашэнка адзначыў, што актыўны ўдзел у будаўніцтве Байкала-Амурскай чыгуначнай магістралі разам з прадстаўнікамі іншых братніх савецкіх народаў прымалі каля 60 тыс. беларусаў, дэманструючы ўсяму свету, на што здольныя сапраўдныя патрыёты, аб'яднаныя вялікай мэтай. "Вашы працоўныя подзвігі – годны прыклад для цяперашняй моладзі", – падкрэсліў Прэзідэнт.
 
Кіраўнік дзяржавы пажадаў удзельнікам легендарнай будоўлі розных пакаленняў моцнага здароўя, шчасця, дабрабыту і поспехаў ва ўсіх пачынаннях.

Крыніца: belta.by