«Механізм адзін – плаціць за вынік». Лукашэнка аб падыходах да ўдасканалення навуковай дзейнасці
Фінансаванне навуковай дзейнасці і аплата працы вучоных павінны залежаць перш за ўсё ад выніку. Пра гэта Прэзідэнт Беларусі Аляксандр Лукашэнка заявіў на нарадзе па праекце ўказа аб удасканаленні навуковай дзейнасці, перадае карэспандэнт БЕЛТА.
Кіраўнік дзяржавы нагадаў, што пытанні развіцця айчыннай навукі нядаўна ўжо абмяркоўваліся на шырокай нарадзе (нарада па пытаннях развіцця навуковай сферы і дзейнасці Нацыянальнай акадэміі навук Беларусі 21 лістапада 2025 года. - Заўв. БЕЛТА): "Тады быў узняты шэраг старых новых пытанняў. На жаль, нічога новага і ў выступленні Уладзіміра Сцяпанавіча (старшыні Прэзідыума НАН Беларусі Уладзіміра Караніка. - Заўв. БЕЛТА) не было аб развіцці і, можа быць, рэфармаванні, мадэрнізацыі нашай Акадэміі навук. Але мы дамовіліся, што падрыхтуем праект указа аб удасканаленні наогул навуковай дзейнасці, і вы ўнясеце гэты праект указа для разгляду".
"У мяне пасля азнаямлення з праектам указа з'явілася нямала пытанняў. І я хацеў бы з вамі абмеркаваць гэтыя пытанні. Але тады на нарадзе мы ўмовіліся, што калі гаворка ідзе пра грошы, пра аплату, то механізм адзін - плаціць за вынік. Ёсць вынік - плацім. Няма выніку - ніякіх грошай не будзе. Як бы там нашы безумоўна разумныя вучоныя людзі ні падносілі гэтае пытанне", - падкрэсліў кіраўнік дзяржавы.
Аляксандр Лукашэнка папрасіў далажыць, як прадстаўлены праект указа забяспечвае дасягненне мэт і якія для гэтага прапануюцца інструменты. "Пакуль выразна праглядаецца не вельмі шмат: базавае фінансаванне і магчымасці вучоным выкладаць у ВНУ. Ну а хто супраць? Ніхто не супраць. І сёння, па-мойму, гэты працэс паспяхова развіваецца, - заўважыў Прэзідэнт. - А пра эфектыўнасць, вынікі навуковай дзейнасці? Тут адсылачныя нормы, як юрысты кажуць: "Гэта вызначыць урад". Дык навошта мы тады праект указа ўносім?"