Пад афіцыйным апублікаваннем нарматыўных прававых актаў разумеецца давядзенне іх да ўсеагульнага ведама шляхам узнаўлення тэксту нарматыўных прававых актаў у перыядычным друкаваным выданні Нацыянальнага рэестра прававых актаў Рэспублікі Беларусь, яго электроннай версіі і іншых афіцыйных выданнях, вызначаемых Прэзідэнтам Рэспублікі Беларусь.
У выпадках, прадугледжаных заканадаўчымі актамі Рэспублікі Беларусь, афіцыйнае апублікаванне нарматыўных прававых актаў ажыццяўляецца ў электроннай версіі адпаведнага нумара перыядычнага друкаванага выдання Нацыянальнага рэестра прававых актаў Рэспублікі Беларусь без афіцыйнага апублікавання гэтых актаў у дадзеным перыядычным друкаваным выданні.
Афіцыйнае апублікаванне нарматыўных прававых актаў ажыццяўляецца на той дзяржаўнай мове, на якой яны прыняты (выдадзены). Афіцыйнае апублікаванне нарматыўнага прававога акта на іншых мовах дапускаецца толькі пры наяўнасці яго афіцыйнага перакладу на адпаведную мову, зацверджанага адпаведным дзяржаўным органам ( службовай асобай) у парадку, устаноўленым для прыняцця (выдання) гэтага акта.
Датай афіцыйнага апублікавання нарматыўнага прававога акта лічыцца дзень выхаду ў свет афіцыйнага выдання, у якім змешчаны гэты акт. У выпадку разначаснага апублікавання нарматыўнага прававога акта ў некалькіх афіцыйных выданнях дата афіцыйнага апублікавання нарматыўнага прававога акта і тэрмін уступлення яго ў сілу вызначаюцца па даце першапачатковага апублікавання.
Не падлягаюць апублікаванню нарматыўныя прававыя акты або асобныя іх палажэнні, якія змяшчаюць дзяржаўныя сакрэты або іншыя звесткі, якія ахоўваюцца заканадаўствам Рэспублікі Беларусь, калі іншае не прадугледжана заканадаўствам Рэспублікі Беларусь.
Рашэнне аб тым, што нарматыўны прававы акт або яго асобныя палажэнні не падлягаюць апублікаванню, прымаецца ва ўстаноўленым заканадаўствам Рэспублікі Беларусь парадку ўпаўнаважаным дзяржаўным органам ( службовай асобай), аб чым на арыгінале нарматыўнага прававога акта робіцца адпаведная адзнака. Нарматыўныя прававыя акты публікуюцца з указаннем іх абавязковых рэквізітаў: віду акта, даты яго прыняцця (выдання), парадкавага нумара і назвы. Афіцыйнае апублікаванне нарматыўных прававых актаў у няпоўным выкладзе не дапускаецца, за выключэннем выпадкаў:
- апублікавання нарматыўных прававых актаў, асобныя палажэнні якіх змяшчаюць дзяржаўныя сакрэты або іншыя звесткі, якія ахоўваюцца заканадаўствам Рэспублікі Беларусь;
- прыняцця нарматворчым органам ( службовай асобай) рашэння аб тым, што асобныя палажэнні нарматыўнага прававога акта не падлягаюць рассылцы (з выкарыстаннем адпаведнай пастрафовай заўвагі).
Пры гэтым такі нарматыўны прававы акт падлягае ўключэнню ў поўным выкладзе ў адзіны эталонны банк даных прававой інфармацыі, які фарміруецца Нацыянальным цэнтрам прававой інфармацыі Рэспублікі Беларусь.