Як паступаць юрыдычным асобам з адходамі будаўніцтва??

Пры ажыццяўленні будаўніцтва, рэканструкцыі, зносу аб'ектаў у будаўнічых арганізацый утвараюцца адходы вытворчасці.

Зварот з адходамі пры ажыццяўленні будаўнічай дзейнасці ажыццяўляецца з выкананнем патрабаванняў, устаноўленых заканадаўствам у галіне архітэктурнай, горадабудаўнічай і будаўнічай дзейнасці, аб ахове навакольнага асяроддзя (Закон аб звароце з адходамі і іншыя ТНПА).

Пры распрацоўцы праектнай дакументацыі на будаўніцтва павінен прадугледжвацца комплекс мерапрыемстваў па звароце з адходамі, які ўключае:

- вызначэнне колькасці і якасных паказчыкаў адходаў, што ўтвараюцца (хімічны склад, агрэгатны стан, ступень небяспекі і г.д.) і магчымасці іх выкарыстання;

- вызначэнне месцаў часовага захоўвання адходаў на будаўнічай пляцоўцы;

- праектныя рашэнні па перавозцы адходаў у санкцыянаваныя месцы захоўвання адходаў, санкцыянаваныя месцы пахавання адходаў альбо на аб'екты абясшкоджвання адходаў і (або) на аб'екты па выкарыстанні адходаў;

- іншыя мерапрыемствы, накіраваныя на забеспячэнне выканання заканадаўства аб звароце з адходамі.

Дэкрэтам Прэзідэнта Рэспублікі Беларусь ад 23.11.2017 № 7 «Аб развіцці прадпрымальніцтва» спрошчаны парадак зносу невыкарыстоўваемых аб'ектаў будаўніцтва.

Па рашэнні мясцовых выканаўчых і распарадчых органаў вызначаецца парадак звароту з адходамі, што ўтвараюцца пры зносе (уключаючы магчымасць іх перадачы насельніцтву, сялянскім (фермерскім) гаспадаркам і іншым арганізацыям, а таксама выкарыстання для рэкультывацыі кар'ераў, выканання работ па вертыкальнай планіроўцы парушаных зямель, у тым ліку ў месцы вытворчасці работ па зносе невыкарыстоўванага аб'екта, для падсыпкі асноў дарог, у якасці ізаляцыйных слаёў на аб'ектах пахавання адходаў).

Парушэнне прыродаахоўных патрабаванняў пры звароце з адходамі будаўніцтва з'яўляецца правапарушэннем, што згодна з артыкуламі 16.3, 16.44 часткі 3 КоАП цягне адміністрацыйную адказнасць.