Прайшла прэзентацыя пятага выдання Чырвонай кнігі Беларусі

Чырвоная кніга Рэспублікі Беларусь (асноўны спіс раслін і жывёл), у адрозненне ад міжнароднай і многіх рэгіянальных еўрапейскіх кніг, якія носяць рэкамендацыйны характар, з'яўляецца дзяржаўным дакументам і мае юрыдычны статус.

Сёлета супрацоўнікамі Інстытута эксперыментальнай батанікі імя В.Ф. Купрэвіча Нацыянальнай акадэміі навук Беларусі было падрыхтавана яе 5-е выданне. У новай рэдакцыі аказалася ўключана 310 відаў, у тым ліку: 189 відаў сасудзістых раслін, 37 – мохападобных, 23 – водарасцяў, 29 – лішайнікаў і 32 – грыбоў.

24 снежня Міністэрства прыродных рэсурсаў і аховы навакольнага асяроддзя Рэспублікі Беларусь правяло афіцыйную прэзентацыю гэтай кнігі.

У новым выданні для кожнага з відаў прыведзены катэгорыі нацыянальнага і міжнароднага прыродаахоўнага значэння, кароткае апісанне, інфармацыя аб распаўсюджванні, месцах пражывання, біялогіі, колькасці і тэндэнцыях яе змены, асноўных фактарах пагроз, мерах аховы, а таксама фатаграфічныя матэрыялы і картасхемы распаўсюджвання ў рэспубліцы. Таксама прыведзены дадаткі ў выглядзе анатаваных спісаў відаў сасудзістых раслін, мохападобных, водарасцяў, лішайнікаў і грыбоў, якія верагодна зніклі з тэрыторыі Беларусі («чорны спіс») і спісы відаў сасудзістых раслін, мохападобных, водарасцяў, лішайнікаў і грыбоў, якія патрабуюць дадатковага вывучэння і ўвагі ў мэтах прафілактычнай аховы.