Аб укараненні сістэмы кіравання навакольным асяроддзем на адпаведнасць СТБ ISO 14001-2017

Адным з напрамкаў зніжэння адмоўнага ўздзеяння суб'ектаў гаспадарання на навакольнае асяроддзе з'яўляецца стварэнне і ўкараненне на прадпрыемствах і ў арганізацыях сістэм кіравання (менеджменту) навакольным асяроддзем (СКУНА) і іх далейшая сертыфікацыя.

Укараненне СКУНА — гэта працэс распрацоўкі і ўкаранення на прадпрыемстве сістэмы, якая дазваляе кіраваць экалагічнымі аспектамі дзейнасці і зніжаць негатыўнае ўздзеянне на навакольнае асяроддзе, што спрыяе выкананню заканадаўства, зніжэнню выдаткаў, павышэнню канкурэнтаздольнасці і ўстойліваму развіццю.

Сертыфікацыя па СТБ ISO 14001-2017 – гэта пацвярджэнне адпаведнасці СКУНА арганізацыі патрабаванням нацыянальнага стандарту Рэспублікі Беларусь СТБ ISO 14001-2017 Сістэмы кіравання (менеджменту) навакольным асяроддзем. Патрабаванні і кіраўніцтва па прымяненні (далей – СТБ ISO 14001-2017), які заснаваны на міжнародным стандарце ISO 14001.

Этапы ўкаранення СКУНА ў адпаведнасці з СТБ ISO 14001-2017:

— навучанне супрацоўнікаў асновам СКУНА і патрабаванням СТБ ISO 14001-2017;

— распрацоўка плана мерапрыемстваў (дзеянняў) па ўкараненні СКУНА;

— аналіз унутраных і знешніх фактараў, якія могуць уплываць на ўкараненне СКУНА;

— распрацоўка дакументаў СКУНА ў адпаведнасці з патрабаваннямі СТБ ISO 14001-2017;

— правядзенне ўнутранай праверкі для ацэнкі эфектыўнасці ўкаранёнай СКУНА;

— падача ў акрэдытаваны орган па сертыфікацыі заяўкі на сертыфікацыю;

— праходжанне аўдыту СКУНА і атрыманне экалагічнага сертыфіката адпаведнасці.

Сертыфікацыя па СТБ ISO 14001-2017 з'яўляецца добраахвотнай, але наяўнасць сертыфіката сведчыць аб прыхільнасці арганізацыі прынцыпам экалагічнай адказнасці і можа быць важным фактарам для яе паспяховай дзейнасці.