Аб недапушчэнні выпальвання сухой расліннасці, травы на корані, а таксама строн і пажніўных рэшткаў на палях

У адпаведнасці з артыкулам 20 Закона Рэспублікі Беларусь «Аб раслінным свеце» выпальванне сухой расліннасці (сухіх дзікарослых раслін) і яе рэшткаў на корані забараняецца.

Згодна з правіламі пажарнай бяспекі ў лясах у перыяд з моманту сходу снежнага покрыва зямлі да наступлення ўстойлівага дажджлівага надвор'я забараняецца: разводзіць вогнішчы ў хваёвых маладняках, на ўчастках пашкоджанага лесу (ветравал і буралом), тарфяніках, у месцах з падсохлай травой; паліць траву і разводзіць вогнішчы ў траве, пакідаць палаючы агонь без нагляду; пакідаць непатушаныя крыніцы гарэння і тлення (запаленыя запалкі, недакуркі і інш.).

Развядзенне вогнішчаў (у тым ліку з выкарыстаннем прыстасаванняў: мангалаў, барбекю, грылю, газавых пліт і г.п.) дапускаецца на добраўпарадкаваных пляцоўках, акаймаваных мінералізаванай (ачышчанай да мінеральнага слоя глебы) паласой шырынёй не менш за 0,25 м, а таксама ў месцах, якія выключаюць пашкоджанне агнём кронаў, ствалоў і каранёвых лап растучых дрэў, акрамя забароненых участкаў. Пасля мінавання патрэбы вогнішча павінна быць патушана да поўнага спынення тлення.

У адпаведнасці з артыкулам 16.40 Кодэкса Рэспублікі Беларусь аб адміністрацыйных правапарушэннях незаконнае выпальванне сухой расліннасці, травы на корані, а таксама стэрні і пажніўных рэшткаў на палях альбо непрыняцце мер па ліквідацыі выпальванняў на зямельных участках цягне за сабой прыцягненне да адміністрацыйнай адказнасці ў выглядзе штрафу ў памеры ад дзесяці да трыццаці базавых велічынь.

У адпаведнасці з артыкулам 16.41 Кодэкса Рэспублікі Беларусь аб адміністрацыйных правапарушэннях за развядзенне вогнішчаў у забароненых месцах прадугледжана накладанне штрафу ў памеры да дванаццаці базавых велічынь.

Памер шкоды, прычыненай навакольнаму асяроддзю пры незаконным выпальванні сухой расліннасці, травы на корані (акрамя газонаў, кветнікаў, лясной падсцілкі, жывога напольнага покрыва), а таксама стэрні і пажніўных рэшткаў устаноўлены Пастановай Савета Міністраў Рэспублікі Беларусь ад 11.04.2023 № 219 «Аб таксах для вызначэння памеру ўрону, прычыненага навакольнаму асяроддзю, і парадку яго разліку».

Перш чым кінуць запалку, падумайце аб згубных наступствах для прыроды!