У вясняны час многія звяртаюць увагу на пах бэзу. Здаецца, што гэты чароўны водар паўсюль, і ён вабіць знайсці кусты, усыпаныя духмянымі кветкамі.

Ламаць бэз у Беларусі, як і любы іншы хмызняк, які расце ў населеных пунктах, нельга. Гэта забаронена законам «Аб раслінным свеце». Ім жа ўстаноўлены крытэрый, што з'яўляецца пашкоджаннем хмызняку, а што не. Так вось пашкоджанне — гэта абламванне да ступені спынення росту.

Важна памятаць:

бэз, высаджаны на землях агульнага карыстання, — гэта грамадскі здабытак;

калі суквецці з куста абламваць рэгулярна, ён зачахне, красаванне будзе непаўнавартасным або ж урэшце загіне;

бэз, які расце ў дварах, скверах, ставіцца да драўняна-хмызняковай расліннасці, што знаходзіцца ў веданні камунальных службаў.

Калі бэз расце на прысядзібным участку, дачы, тэрыторыі прыватнага дома, то гаспадары маюць права сарваць галінку бэзу, бо ў такім выпадку хмызняк не з'яўляецца элементам гарадскога асяроддзя.

Расонская раённая інспекцыя прыродных рэсурсаў і аховы навакольнага асяроддзя папярэджвае, што за ігнараванне закона наступае адміністрацыйная адказнасць. У адпаведнасці з КоАП РБ за пашкоджанне дрэў і хмызнякоў прадугледжаны штраф да 30 базавых велічынь (1350 рублёў). Таму нават самы маленькі букет духмянага бэзу можа абысціся яго ўладальніку ў сур'ёзную суму.