Экалагічны тыдзень, прысвечаны Сусветнаму дню аховы навакольнага асяроддзя, на Расоншчыне працягваецца!
Сёння бераг возера Росано стаў пляцоўкай для займальнага інтэрактыўнага мерапрыемства «Таямніцы азёрнага берага».
Расонская раённая інспекцыя прыродных рэсурсаў і аховы навакольнага асяроддзя сумесна з дзяржаўнай прыродаахоўнай установай «ЭКА-РОСЫ» правялі камандную гульню для ўдзельнікаў, якія наведваюць аддзяленне сацыяльнай рэабілітацыі, абілітацыі інвалідаў Расонскага раёна.
Удзельнікі спаборнічалі ў турыстычных навыках: на хуткасць збіралі палатку, раскідвалі спальныя мяшкі і вучыліся правільна ўладкоўваць бяспечнае месца для вогнішча. Далучыўшыся да акцыі «Зробім чысцей родны край!», яны таксама ўнеслі свой уклад у захаванне прыроды і ачысцілі ад смецця прыбярэжную паласу возера. У гэтых спаборніцтвах прайграўшых не было — перамагла дружба!
А прыемным фіналам свята стала чаяванне, дзе ўсе змаглі абмеркаваць вынікі сустрэчы.