12 кастрычніка 2024 года – Сусветны дзень барацьбы з артрытам
Штогод 12 кастрычніка адзначаецца Сусветны дзень барацьбы з артрытам, які праводзіцца з 1996 года па ініцыятыве Сусветнай арганізацыі аховы здароўя. Мэта правядзення гэтага дня – прыцягненне ўвагі і інфармаванасці шырокай грамадскасці да праблем рэўматалагічных захворванняў, важнасці вырашэння пытанняў своечасовай дыягностыкі і прафілактыкі артрыту.
Артрыт – гэта сур'ёзнае запаленчае захворванне сустава або некалькіх суставаў, якое пры адсутнасці лячэння прыводзіць не толькі да болевых адчуванняў і абмежавання руху, але і да інваліднасці і страты працаздольнасці.
Прычыны з'яўлення хваробы розныя: паўтаральныя пашкоджанні суставаў; генетычная схільнасць; хірургічныя ўмяшанні, пераахаладжэнне; развіццё артрыту таксама правакуюць вірусныя і бактэрыяльныя інфекцыі; фізічныя і псіхічныя нагрузкі; стрэс; празмернае курэнне. Да фактараў рызыкі, якія выклікаюць артрыт, адносіцца злоўжыванне кафеінам, залішняя вага, парушэнне абмену рэчываў, алергічныя захворванні.
І хоць прычыны развіцця артрытаў разнастайныя, але лекары адзіныя ў меркаванні, што лепшы сродак пры любым захворванні – гэта прафілактыка.
Знізіць рызыку развіцця артрыту можна, прытрымліваючыся простых парад:
- харчуйцеся рацыянальна, больш ужывайце агародніны, садавіны, клятчаткі, прадуктаў, якія змяшчаюць кальцый;
- не пераахалоджвайцеся;
- носіце зручны абутак;
- адмоўцеся ад шкодных звычак (алкаголь і курэнне могуць спрыяць развіццю запаленчага працэсу);
- часцей бывайце на свежым паветры;
- мінімум паўгадзіны ў дзень фізічных практыкаванняў умацуюць мышцы, палепшаць выправу і на доўгія гады захаваюць і падоўжаць здароўе суставаў;
- мінімум стрэсаў.
Пры з'яўленні наступных сімптомаў звяртайцеся да лекара:
- боль у суставе або суставах, асабліва выяўленая ў начны і ранішні час;
- ранішняя скаванасць – практычна поўная нерухомасць у суставах пасля начнога сну, якая праходзіць пасля невялікай размінкі;
- ацёк аднаго або некалькіх суставаў – невялікае павелічэнне іх у аб'ёме, часта суправаджаецца балючасцю, павышэннем тэмпературы;
- дэфармацыя – змяненне формы, канфігурацыі суставаў.
Ваша здароўе – у вашых руках!
ДПУ «Расонскі РЦГЗ», кастрычнік 2024 г.