Россоны. З ведамі аб бяспецы ў новы навучальны год!
Супрацоўнікі Расонскага раённага аддзела па надзвычайных сітуацыях праводзяць мерапрыемствы для дзяцей і іх бацькоў у рамках рэспубліканскай акцыі «У цэнтры ўвагі – дзеці!».
У рамках першага этапу акцыі ратавальнікі, пачынаючы з 19 жніўня, праводзяць мерапрыемствы ў гандлёвых аб'ектах, куды прыходзяць дзеці і іх бацькі, каб купіць усё неабходнае да новага навучальнага года.
Супрацоўнікі аддзела прапануюць наведвальнікам крам стаць удзельнікамі цікавых інтэрактыўных пляцовак. Адной з іх з'яўляецца пляцоўка пад назвай «Экзамен па бяспецы». Тут пад пільным кантролем мам і тат, а таксама ратавальнікаў, дзеці праходзяць тэарэтычныя заданні, адказваючы на пытанні, якія тычацца пажарнага абсталявання і тэхнікі, правільных дзеянняў пры ўзнікненні надзвычайных сітуацый. У практычнай частцы ўдзельнікі на хуткасць апранаюць баявую вопратку, усталёўваюць і правяраюць на працаздольнасць аўтаномны пажарны апавяшчальнік, вучацца вязаць вузлы, якімі карыстаюцца ў сваёй дзейнасці ратавальнікі. Пасля завяршэння ўсіх выпрабаванняў супрацоўнікі МНС уручаюць дзецям «Дзённікі бяспекі» і сертыфікаты аб паспяховым праходжанні экзамену па бяспецы 2024, а таксама памятныя падарункі да пачатку навучальнага года.
Падчас правядзення мерапрыемстваў работнікі аддзела прэзентуюць новую інфармацыйную кампанію Міністэрства па надзвычайных сітуацыях «Стыхія не мае сэрца!».