Тварыць добрыя справы не складана!
МНС надае вялікую ўвагу працы з дзецьмі і моладдзю, праводзіць мерапрыемствы па фарміраванні культуры бяспекі жыццядзейнасці. Адным з іх з'яўляецца рэспубліканская акцыя "Моладзь за бяспеку". У межах акцыі юныя актывісты разам са ратавальнікамі прынялі ўдзел у марафоне «101 дабро».
Юныя памочнікі ратавальнікаў сумесна з работнікамі Расонскага раённага аддзела па надзвычайных сітуацыях наведалі домаўладанні пенсіянераў і аказалі ім пасільную дапамогу ва ўборцы прыдамавых тэрыторый і забеспячэнні бяспекі ў домаўладаннях.
Для членаў Беларускай маладзёжнай грамадскай арганізацыі ратавальнікаў-пажарных удзел у марафоне стаў цікавым вопытам. Хлопцы з энтузіязмам браліся за пастаўленыя задачы і адказна выконвалі іх. Пасля аказання дапамогі юныя ратавальнікі ўручалі пенсіянерам наглядныя дапаможнікі і распавядалі аб правілах бяспечных паводзін у быце. У сваю чаргу грамадзяне паважанага ўзросту не пакінулі юных памочнікаў без кампліментаў і пачастункаў.
Плённая праца юных ратавальнікаў-пажарных па аказанні дапамогі прынесла пазітыўныя эмоцыі не толькі наведаным пенсіянерам, але і самім хлопцам. Такія мерапрыемствы стануць выдатным прыкладам для моладзі і пакажуць, што тварыць добрыя справы не складана.