Ратавальнікі нагадваюць правілы паводзінаў падчас непагадзі

Каб не стаць ахвярай непагадзі, дастаткова засвоіць шэраг нескладаных правілаў паводзінаў. І калі непагадзь заспела вас знянацку, дзейнічаць трэба ў залежнасці ад сітуацыі.

Рэкамендацыі пры моцным ветры:

- загадзя прыбярыце гаспадарчыя рэчы з двара і балконаў у дом (падвал), абрэжце сухія дрэвы, якія могуць нанесці шкоду вашаму жыллю;

- машыну пастаўце ў гараж, калі такога няма, то прыпаркуйце яе воддаль ад дрэваў, а таксама слаба ўмацаваных канструкцый;

- знаходзячыся на вуліцы, абыходзьце хісткія будынкі і дамы з няўстойлівым дахам;

- пазбягайце дрэваў і разнастайных збудаванняў павышанай рызыкі (мастоў, эстакад, трубаправодаў, ліній электраперадач, патэнцыйна небяспечных прамысловых аб'ектаў).

Як паводзіць сябе пры навальніцы

Калі вы ў доме, то па магчымасці не выходзьце з яго, зачыніце вокны і коміны, каб пазбегнуць скразняку, не рэкамендуецца таксама тапіць печку; трымайцеся далей ад электраправодкі, антэн, адключыце радыё і тэлевізар, пазбягайце выкарыстання тэлефона і электрапрыбораў. Калі ж вы на адкрытай мясцовасці, то памятайце, што маланка б'е ў самую высокую кропку на сваім шляху. Вялікае дрэва, чалавек у полі і ёсць гэтая высокая кропка, таму не хавайцеся пад высокія дрэвы (асабліва адзінокія). Пры адсутнасці хованкі варта легчы на зямлю або прысесці ў сухую яму, траншэю, прыгнуўшы галаву, у лесе трэба схавацца сярод нізкарослай расліннасці.

Падчас навальніцы нельга купацца ў вадаёмах, не варта бегаць, а калі вы едзеце на ровары ці матацыкле – спыніце рух, пакіньце іх і пераначуйце навальніцу на адлегласці прыкладна ў 30 метрах ад свайго транспарту. Падчас навальніцы варта знаходзіцца на адлегласці ад ліній электраперадач, бо электрычнасць прыцягвае маланку. Калі вы на ўзвышшы, то спусціцеся ўніз, у лодцы – грэбіце да берага, у аўтамабілі – спыніцеся і зачыніце вокны, заставайцеся ў ім.

Што рабіць пры моцным дажджы і градзіне

Пры атрыманні інфармацыі аб выпадзенні багатых ападкаў устрымайцеся ад паездак па горадзе, па магчымасці заставайцеся ў кватэры або на працы. Уключыце сродкі праваднога і радыёвяшчання. Калі моцны дождж заспеў вас на вуліцы, не спускайцеся ў падземныя пераходы і іншыя заглыбленыя памяшканні. Паспрабуйце схавацца ў будынках, якія знаходзяцца вышэй магчымага ўзроўню падтаплення, напрыклад, падніміцеся на вышэй размешчаныя паверхі, выключыце электрычнасць і газ, шчыльна зачыніце вокны, дзверы і паведаміце аб сваім месцазнаходжанні ў дзяжурную службу МНС па тэл. 101 і 112.

Пры градзіцы па магчымасці не выходзьце з дома, а знаходзячыся ў памяшканні, трымайцеся як мага далей ад вокнаў. Не карыстайцеся электрапрыборамі, бо градзіца звычайна суправаджаецца навальнічнай дзейнасцю. Знаходзячыся на вуліцы, паспрабуйце выбраць сховішча. Калі гэта немагчыма, абараніце галаву ад удараў градзіц (прыкрыйце яе рукамі, сумкай, адзеннем).

Калі вы перамяшчаецеся на аўтамабілі, то спыніцеся, размясціцеся ў машыне далей ад шкла: пажадана развярнуцца да іх спіной (тварам да цэнтра салона) і прыкрыць вочы рукамі або адзеннем. Калі з вамі апынуліся маленькія дзеці, то іх неабходна закрыць сваім целам, прыкрыўшы ім вочы альбо адзеннем, альбо рукой. Калі дазваляюць габарыты салона, лепш за ўсё легчы на падлогу. Не пакідайце аўтамабіль. Памятайце, што сярэдняя працягласць градзіцы складае прыкладна 6 хвілін, вельмі рэдка даўжэй.