Агульныя звесткі аб арганізацыі дзяржаўнай улады ў Рэспубліцы Беларусь і аб нацыянальнай прававой сістэме
Дзяржаўная ўлада ў Рэспубліцы Беларусь ажыццяўляецца на аснове падзелу яе на:
- заканадаўчую;
- выканаўчую;
- судовую.
Дзяржаўныя органы ў межах сваіх паўнамоцтваў самастойныя. Яны ўзаемадзейнічаюць паміж сабой, стрымліваюць і ўраўнаважваюць адзін аднаго.
Адзінай крыніцай дзяржаўнай улады ў Рэспубліцы Беларусь з'яўляецца народ.
Народ ажыццяўляе сваю ўладу як праз прадстаўнічыя і іншыя дзяржаўныя органы, так і непасрэдна ў формах і межах, вызначаных Канстытуцыяй краіны.
Дзяржава, усе яе органы і службовыя асобы дзейнічаюць у межах Канстытуцыі Рэспублікі Беларусь і прынятых у адпаведнасці з ёй актаў заканадаўства. Такім чынам сцвярджаецца і рэалізуецца прынцып вяршэнства права.
Найвышэйшай каштоўнасцю і мэтай грамадства і дзяржавы ў Рэспубліцы Беларусь з'яўляюцца чалавек, яго правы, свабоды і гарантыі іх рэалізацыі.
Сістэма органаў дзяржаўнай улады краіны ўключае ў сябе:
- Прэзідэнта Рэспублікі Беларусь (Кіраўніка дзяржавы);
- Парламент (Нацыянальны сход Рэспублікі Беларусь: Савет Рэспублікі і Палату прадстаўнікоў);
- Урад (Савет Міністраў Рэспублікі Беларусь);
- суды;
- пракуратуру;
- Камітэт дзяржаўнага кантролю Рэспублікі Беларусь;
- органы мясцовага кіравання.